Тазалық – ортақ міндет, көркейту – ортақ парыз
Құрметті Іле ауданының тұрғындары!
Тазалық – мәдениеттің, жауапкершіліктің және туған жерге деген жанашырлықтың айқын көрінісі. Қоршаған ортаның таза болуы тұрғындардың өмір сүру сапасына, денсаулығына және болашақ ұрпақтың игілігіне тікелей әсер етеді.
Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» республикалық экологиялық акциясы бүгінде ел көлеміндегі маңызды қоғамдық қозғалысқа айналды. Бұл бастама табиғатты қорғауға, қоршаған ортаны жақсартуға және елді мекендерді көркейтуге бағытталған.
Іле ауданында да аталған акция аясында жүйелі жұмыстар жүргізілуде. Көшелер мен қоғамдық орындар тазартылып, ағаш көшеттері отырғызылып, санитарлық тазалық пен абаттандыру шаралары тұрақты түрде ұйымдастырылып келеді.
Осыған орай, 18 маусым күні аудан көлемінде жалпыаудандық сенбілік өтеді. Іс-шараға мемлекеттік мекемелердің қызметкерлері, кәсіпкерлер, жастар, қоғамдық ұйымдар және белсенді тұрғындар қатысады.
Сенбілік – тек тазалық шарасы ғана емес. Бұл туған жерге деген құрметтің, азаматтық жауапкершіліктің және қоғамдық бірліктің нақты көрінісі. Әрбір тазартылған аумақ пен әрбір отырғызылған көшет ауданымыздың келешегіне қосылған үлес.
Іле ауданы – қарқынды дамып келе жатқан өңір. Оның тазалығы мен көркі әрқайсымыздың күнделікті іс-әрекетімізге байланысты. Сондықтан қоршаған ортаны таза ұстау тек сенбілік күндерімен шектелмей, тұрақты дағдыға айналуы тиіс.
Қадірлі жерлестер! Баршаңызды 18 маусым күні өтетін жалпыаудандық сенбілікке белсенді қатысуға шақырамын. Бірлігіміз бен ұйымшылдығымыздың арқасында ауданымызды одан әрі көркейтіп, таза әрі жайлы орта қалыптастыра аламыз.
Туған жеріміздің тазалығы – өз қолымызда. Ортақ іске жұмылып, Іле ауданын бірге көркейтейік!
Құрметпен, Қайыржан Жақсымбетов
