«ЗАҢ МЕН ТӘРТІП» ҚАҒИДАТЫ АЯСЫНДА ӨРТ ҚАУІПСІЗДІГІ БОЙЫНША ПРОФИЛАКТИКАЛЫҚ ЖҰМЫСТАР ЖҮРГІЗІЛДІ
«Заң мен тәртіп» қағидаты аясында Алматы облысы Іле ауданының Төтенше жағдайлар бөлімінің қызметкерлері өрт қауіпті кезеңде қауіпсіздік талаптарының сақталуын қамтамасыз ету мақсатында аудан аумағындағы шаруа қожалықтарында профилактикалық жұмыстар жүргізді.
Іс-шара барысында мамандар шаруа қожалықтарының иелері мен қызметкерлеріне өрттің алдын алу шаралары жөнінде түсіндіру жұмыстарын жүргізіп, өрт қауіпсіздігі ережелерін қатаң сақтау қажеттігін ескертті. Сондай-ақ егістік алқаптарында, шөп сақтау орындарында және ауыл шаруашылығы техникаларын пайдалану кезінде қауіпсіздік талаптарын сақтау, ашық отты абайлап қолдану, жанғыш қалдықтарды өртемеу және алғашқы өрт сөндіру құралдарының жарамдылығын тұрақты бақылауда ұстау мәселелеріне ерекше назар аударылды.
Кездесу барысында азаматтарға өрт шыққан жағдайда дереу «101» немесе «112» нөміріне хабарлау қажеттігі түсіндіріліп, өрт қауіпсіздігі бойынша жадынамалар таратылды.
Мұндай профилактикалық іс-шаралардың негізгі мақсаты – өрттердің алдын алу, тұрғындардың қауіпсіздік мәдениетін қалыптастыру және төтенше жағдайлардың туындау қаупін азайту. Іле ауданында өрт қауіпсіздігін қамтамасыз ету бағытындағы түсіндіру және алдын алу жұмыстары алдағы уақытта да тұрақты түрде жалғасатын болады.
