АЛМАТЫ ОБЛЫСЫНДА БЕЙНЕБАҚЫЛАУ ЖҮЙЕСІ ДАМЫТЫЛУДА
Алматы облысында қоғамдық қауіпсіздікті арттыруға және құқықтық тәртіпті қамтамасыз етуге бағытталған заманауи цифрлық технологиялар кезең-кезеңімен енгізілуде.
Мемлекеттік-жекешелік әріптестік жобасы аясында өңірдің қоғамдық орындары мен негізгі көлік бағыттарын қамтитын бірыңғай бейнебақылау жүйесін құру көзделген.
Атап айтқанда, 9 100 қоғамдық бейнебақылау камерасын орнату жоспарланған. Оның 6 800-і тұрақты камералар болса, 2 300-і PTZ форматындағы бұрылмалы камералар. Мұндай жүйе аумақтағы жағдайды барынша толық бақылауға және туындаған қауіп-қатерлерге жедел ден қоюға мүмкіндік береді.
Жол қозғалысы ережелерінің бұзылуын автоматты түрде тіркеуге де ерекше назар аударылуда. Өңірде 325 стационарлық аппараттық-бағдарламалық кешен орнату көзделген. Оның ішінде 115 «Қиылыс» кешені, 110 «Желілік учаске» кешені және 100 трассалық кешен бар.
Заманауи технологияларды қолдану құқық бұзушылықтарды тіркеумен ғана шектелмейді. Бейнебақылау деректері қылмыстарды ашу, адамдар мен көлік құралдарын анықтау, сондай-ақ азаматтар көп жиналатын орындардағы жағдайды талдау кезінде де пайдаланылады.
Бұл ретте негізгі басымдық профилактикаға беріледі. «Кілемдік» бейнебақылау жүйесі аумақты барынша толық қамтуға, ықтимал қауіпті жағдайларды дер кезінде анықтауға және осылайша құқық бұзушылықтардың алдын алып, азаматтардың қауіпсіздігін арттыруға мүмкіндік береді.
Құқық қорғау қызметін цифрландыру «Заң мен Тәртіп» қағидатын іске асырудың негізгі құралдарының бірі болып табылады және ең алдымен өңір тұрғындары мен қонақтары үшін қауіпсіз орта қалыптастыруға бағытталған.
