Қонаевта Республика күніне арналған «Бір ел – бір тағдыр» атты зияткерлік сайыс өтті
Республика күні қарсаңында «AMANAT» партиясы Алматы облыстық филиалы жанындағы «Жастар рухы» жастар қанатының ұйымдастыруымен патриоттық рухтағы ерекше іс-шара өтті.
Мектеп оқушылары арасында өткен «Бір ел – бір тағдыр» атты зияткерлік Quiz ойынына қаладағы білім беру ұйымдарынан іріктелген 20-дан астам жас қатысты.
Бұл бастаманың мақсаты – жастардың ел тарихы мен тәуелсіздік құндылықтарына деген қызығушылығын арттыру, патриоттық рухты күшейту және ұлттық сана мен жауапкершілікті қалыптастыру.
«Біз Жастар рухының белсенді мүшелерімен бірге елдік сана мен патриоттық рухты дәріптеп, әр жас өз ойын ашық айтып, пікір білдіре алатын орта қалыптастыруды көздедік. Қазір жас ұрпақтың білімге, еркін ойлауға және елдің дамуына үлес қосуға деген талпынысы қуантады. Осындай бастамалар сол жігерді арттыра түседі», – деді «Жастар рухы» жастар қанатының мүшесі Меруерт Тілек.
Қатысушылар бірнеше кезеңнен тұратын сұрақтарға жауап беріп, өз ой-өрісін, логикалық қабілетін және білім деңгейін сынға салды. Ойын барысында қатысушылар Қазақстанның Тәуелсіздік тарихы, мемлекеттік рәміздер, ұлт бірлігі мен егемендіктің қалыптасу кезеңдері жөнінде білгенін ортаға салды.
Байқау қорытындысы бойынша 5 оқушы үздік нәтиже көрсетіп, жеңімпаз атанды.
Марапаттау рәсімінде жеңімпаздарға алғыс хаттар мен естелік сыйлықтар табысталды.
"AMANAT" партиясы Алматы облыстық филиалының баспасөз қызметі.
