«Болашақтың іргетасы: Жаңа Құрылтай және азаматтық жауапкершілік»
Кез келген мемлекеттің даму жолында халықтың үнін еститін, қоғамның мүддесін биік деңгейде қорғайтын институционалдық жүйенің орны қашанда ерекше. Биылғы 23 тамыз күні өтетін Құрылтай сайлауы – бұл жай ғана кезекті сайлау науқаны емес, бұл – еліміздің саяси келбетін жаңа сапалық деңгейге көтеретін терең реформалардың жемісі және тарихи маңызы бар бетбұрыс сәт.
Ел өміріндегі бұл жаңа кезең заман талабына сай мемлекеттік басқару жүйесін жетілдіруге, халық пен билік арасындағы кері байланысты нығайтуға және әрбір азаматтың мемлекеттік маңызы бар шешімдерге тікелей ықпал етуіне кең жол ашады. Жаңа заң шығарушы органның құрамына енетін депутаттарға қоғамның үміті мен сенімін ақтау, халықтың мұң-мұқтажын билік мінберінен нақты іспен көрсету сияқты үлкен жауапкершілік жүктеледі.
Бүгінгі таңда «Менің бір ғана дауысым нені шешеді?» деген пессимистік көзқарастан арылып, ортақ болашағымыз үшін саналы таңдау жасау әрқайсымыздың азаматтық парызымызға айналуы тиіс. Еліміздің ертеңі, экономикалық тұрақтылығымыз, әлеуметтік әділдік пен қоғамдық келісім – дәл осындай маңызды науқандардағы белсенділігіміз бен бірлігімізге тікелей байланысты.
23 тамыз күні әрбір саналы азамат өз дауысын беру арқылы еліміздің ертеңгі бағытын айқындауға үлес қосады. Мемлекеттің дамуына бейжай қарамайтын, өз елінің ертеңіне сеніммен қарайтын әрбір қазақстандық бұл науқанын сырттай бақылаушы емес, нақты қатысушысы болуы тиіс.
Күш біріктіргенде ғана қуаттымыз, саналы таңдау жасағанда ғана болашағымыз баянды болмақ! 23 тамызда бір кісідей қатысып, елдік сана мен азаматтық ұстанымымызды көрсетейік!
Жансая Тлеубекқызы,
№43 орта мектебінің
директордың тәрбие ісі жөніндегі орынбасары.
