СТУДЕНТТІК ЖӘНЕ ЖАСТАР ЕҢБЕК ЖАСАҚТАРЫ АШЫЛУ САЛТАНАТЫ
2026 жылғы 19 маусым күні студенттік және жастар еңбек жасақтарының салтанатты ашылу рәсімі өтті. Ауқымды іс-шара «Ауыл» партиясы ұйымдастыруымен онлайн/офлайн форматындағы республикалық телемост ретінде өткізілді. Іс-шара Астана қаласы мен еліміздің 19 өңірін қамтып, оған 3000-ға жуық жас қатысты.
Аталған іс-шараның басты мақсаты — жастарды еңбекке баулу, олардың белсенді азаматтық ұстанымын қалыптастыру, сондай-ақ жазғы еңбек маусымының ресми басталуын жариялау.
Салтанатты жиын Қазақстан Республикасының Мемлекеттік Гимнімен ашылды. Ресми бөлімде Қазақстан Республикасы Парламенті Мәжілісінің депутаты, «Ауыл» партиясы төрағасы Серік Егізбаев сөз сөйлеп, студенттік еңбек жасақтарының ел болашағын қалыптастырудағы маңызын атап өтті.
Іс-шара барысында Солтүстік Қазақстан, Батыс Қазақстан облыстары мен Шымкент қаласының ардагерлері Zoom платформасы арқылы тікелей байланысқа шығып, жастарға ақ тілектерін жеткізді. Олар өз тәжірибелерімен бөлісіп, еңбек маусымына сәттілік тіледі.
Сондай-ақ, өткен жылғы маусым қорытындысы бойынша үздік сарбаздар мен белсенді жұмыс берушілер марапатталды. Ерекше көзге түскен қатысушыларға алғыс хаттар мен мерейтойлық медальдар табысталды.
«Ауыл» партиясы Алматы қаласы филиалының баспасөз қызметі.
