Ел сенімін нығайтады
Біз, аналар кеңесінің мүшелері, Қазақстан Республикасының жаңа Конституциясын елдің болашағына бағытталған маңызды әрі стратегиялық қадам деп бағалаймыз.
Ата Заң жобасында адам құқықтары мен бостандықтарын қорғау, отбасылық құндылықтарды сақтау, әлеуметтік әділеттілікті қамтамасыз ету және қоғамдағы тұрақтылықты нығайту мәселелеріне ерекше назар аударылған.
Жаңа Конституция мемлекеттік басқару жүйесін жетілдіруге, билік тармақтары арасындағы тепе-теңдікті күшейтуге, Парламенттің рөлін арттыруға мүмкіндік береді. Бұл өзгерістер елдегі демократиялық үдерістердің дамуына, ашықтық пен жауапкершіліктің артуына жол ашады деп сенеміз. Сонымен қатар, Конституция жобасында азаматтардың, соның ішінде әйелдер мен аналардың қоғамдық өмірге белсенді араласуына, жергілікті өзін-өзі басқаруды дамытуға және азаматтық қоғам институттарын қолдауға ерекше мән берілген. Бұл халық пен мемлекет арасындағы сенімді нығайтып, болашаққа деген сенімді ұштайды.
Аналар қауымы үшін ең басты құндылық - бейбітшілік, тұрақтылық және ұрпақтың қауіпсіз болашағы. Осы тұрғыда жаңа Конституция мемлекеттің азаматтар алдындағы жауапкершілігін күшейтіп, заң үстемдігін қамтамасыз етуге бағытталған маңызды құжат деп есептейміз.
Біз бұл конституциялық реформалар Қазақстанның ұзақ мерзімді дамуына, құқықтық мемлекетті нығайтуға және азаматтық қоғамды одан әрі дамытуға берік негіз қалайды деп сенеміз.
Мейрамкуль ЖАБИЕВА,
Іле аудандық аналар кеңесінің төрағасы
