Жаңа Конституция: Қонаев тұрғындары ел болашағына тілектерін арнады
Қонаев тұрғындары Жаңа Конституцияның күшіне енуіне орай ұйымдастырылған тілек алаңында елдің болашағына, бірлік пен бейбітшілікке арналған ақжарма тілектерін жазды.
1 шілде күні №5 жағажайда «Жаңа Конституция – жаңа кезең, жаңа мүмкіндіктер» атты ақпараттық-танымдық іс-шара өтті. Шараға қала тұрғындары, белсенді жастар, мәслихат депутаттары және азаматтық қоғам өкілдері қатысты.
Іс-шара аясында арнайы тілек алаңы ұйымдастырылып, тұрғындар елдің өркендеуіне, тұрақтылығына және қоғамдық келісімнің нығаюына арналған тілектерін қалдырды.
Қатысушылар Жаңа Конституцияға қатысты ой-пікірлерін білдіріп, оның ел дамуы мен азаматтардың құқықтарын қорғаудағы маңызы туралы пікір алмасты.
Сондай-ақ тұрғындарға Жаңа Конституциядағы негізгі реформалар, заң үстемдігі, азаматтардың құқықтары мен бостандықтары және әділетті қоғам құру бағытындағы өзгерістер түсіндірілді.
Шара барысында құқықтық тақырыптағы танымдық викторина өткізіліп, белсенді қатысушыларға естелік сыйлықтар табысталды. Арнайы фотозонада тұрғындар естелік суретке түсті.
