Біздің күшіміз – бірлікте, тірлігіміз – ынтымақта
Сіздерді 25 Қазан — Қазақстан Республикасы күнімен шын жүректен құттықтаймын!
Бұл күн — ұлт тарихындағы маңызды белес, Тәуелсіз еліміздің іргетасы қаланып, егемендік туралы алғаш рет 1990 жылы Жоғарғы Кеңесте Декларация қабылданған күн. Бұл тарихи құжат — мемлекетіміздің тәуелсіздікке бастаған алғашқы қадамы, демократиялық құндылықтарға бет бұрған сәті болатын. Сондықтан да Республика күні — еліміздің тәуелсіздікке жету жолындағы алғашқы заңды негізінің белгісі ретінде әр қазақтың жүрегінде ерекше орын алады.
Бүгінгі Қазақстан — татулығы жарасқан, дамуға бағыт алған, болашағына сеніммен қарайтын мемлекет. Тәуелсіздігімізді баянды ету — әрқайсымыздың қасиетті борышымыз.
Біздің күшіміз – бірлікте, тірлігіміз – ынтымақта. Мемлекетіміздің әрбір азаматы – еліміздің тірегі, оның болашағын қалыптастырушы тұлға. Сол себепті ел тағдырына бейжай қарамай, жарқын болашақ жолында аянбай еңбек ету – ұлт алдындағы парыз.
Осы мереке күні баршаңызға зор денсаулық, береке-бірлік, бақ-береке және елге деген шынайы сүйіспеншілік тілеймін.
Тәуелсіз еліміздің көк байрағы асқақ желбірей берсін!
Әр шаңырақта бейбітшілік пен молшылық орнасын!
Серік ДУМЧИБАЕВ, "AMANAT" партиясы Талғар аудандық филиалының төрағасы
