«ӘЙЕЛДЕР ҚАНАТЫ» КӘСІПОРЫНДАРДАҒЫ ҚЫЗ-КЕЛІНШЕКТЕРДІҢ ЕҢБЕК ЖАҒДАЙЫМЕН ТАНЫСТЫ
«AMANAT» партиясы Алматы облыстық филиалы жанындағы «Әйелдер қанаты» партияның «Әйелдерге қолайлы кәсіпорын» әйелдерді қолдау стандарты тұжырымдамасы аясында бірқатар өндіріс орындарында болып, еңбек ұжымдарымен кездесті.
Іс-шараға «AMANAT» партиясы Алматы облыстық мәслихат депутаты, «Әйелдер қанатының» төрайымы Меруерт Молдашева және ұйым мүшелері қатысты.
Әйелдер қанатының бастамалары негізінде еліміздің әртүрлі салаларында еңбек етіп жүрген әйелдердің жұмыс жағдайын жақсарту, әлеуметтік, саяси және экономикалық мүмкіндіктерін кеңейту, сондай-ақ отбасылық және демографиялық саясатты қолдау бағытында жүйелі жұмыстар атқарылып келеді.
Жұмысшы топ алдымен «Жұмысшы мамандықтар жылы» аясында ауыр әрі зиянды еңбек жағдайында қызмет атқарып жүрген әйелдердің жағдайына талдау жасау мақсатында «Фирма Бент» ЖШС мекемесіне барды. Мұнда Еңбек кодексінде және басқа да нормативтік құжаттарда көрсетілген жеңілдіктердің, сондай-ақ кәсіпорындардың өз бастамаларымен жүзеге асырып отырған кепілдіктердің орындалу деңгейіне назар аударылды.
Сонымен қатар, топ мүшелері «Dolce-Pharm» мекемесіне барып, ондағы еңбек жағдайымен танысты. Екі кәсіпорында да жұмысшылардың талап-тілектері тыңдалып, олардың ұсыныстары ескерілді. Қызметкерлер тарапынан кездесуде Ынтымақ ықшамауданының тұрғындары жер телімін заңдастыру, ауызсу тапшылығы, электр энергиясының тұрақсыздығы және балалар алаңдарының жетіспеушілігі сияқты мәселелерді көтерді. Бұл мәселелерді тиісті басқарма мамандарымен бірлесіп шешу жолдары қарастырылатыны айтылды.
Жиын соңында жұмысшы топ әйелдердің құқықтарын қорғау және қолайлы еңбек жағдайын қамтамасыз ету бағытындағы жұмыстар алдағы уақытта да жалғасын табатынын атап өтті.
