Жаңаарнада жаңа ФАП ашылды: халық игілігіне бағытталған маңызды қадам

Алатау қаласының Жаңаарна ықшам ауданында заманауи талаптарға сай жаңа фельдшерлік-акушерлік пункт (ФАП) салтанатты түрде ашылып, тұрғындар игілігіне берілді. Бұл нысан – елді мекендегі медициналық қызметтің сапасын арттырып, халыққа алғашқы медициналық көмекті қолжетімді етудегі маңызды қадам.
Ашылу рәсіміне Алатау қаласы әкімінің орынбасары Несипбаева Гүлбану Сейткенқызы мен Алатау қалалық мәслихатының төрағасы Абилова Роза Михаилқызы қатысып, жаңа нысанның лентасын қиып, тұрғындарды айтулы оқиғамен құттықтады. Өз сөздерінде олар денсаулық сақтау саласын дамыту – мемлекеттің басты басымдықтарының бірі екенін атап өтіп, мұндай жобалардың халықтың өмір сүру сапасын арттырудағы рөліне ерекше тоқталды.
Жаңа ФАП қажетті медициналық құрал-жабдықтармен толық қамтылған. Мұнда тұрғындарға алғашқы медициналық-санитарлық көмек көрсетіліп, профилактикалық тексерулер жүргізіледі, жүкті әйелдер мен балаларға жүйелі бақылау ұйымдастырылады. Сонымен қатар, шұғыл жағдайларда жедел медициналық көмек көрсету мүмкіндігі қарастырылған.
Аталған медициналық нысанның іске қосылуы Жаңаарна ықшам ауданы тұрғындары үшін үлкен қолдау болып табылады. Енді жергілікті халық алысқа сабылмай-ақ, сапалы әрі жедел медициналық қызмет ала алады.
Бұл – Алатау қаласында әлеуметтік инфрақұрылымды дамыту бағытында атқарылып жатқан жүйелі жұмыстардың нақты нәтижесі. Алдағы уақытта да тұрғындардың әл-ауқатын арттыруға бағытталған осындай игі бастамалар өз жалғасын таба бермек.