Заң бұзған коммуналдық қызмет көрсету субъектілері жауапқа тартылды
Ұлттық экономика министрлігі Табиғи монополияларды реттеу комитетінің Алматы облысы бойынша департаменті су, электр қуаты және газ тарату қызметін көрсететін мекемелер мен жекеменшік субъектілерін жоспардан тыс тексеріп, бірқатар заң бұзушылықты анықтады. Бұл туралы департаменттің баспасөз қызметі хабарлады.
Департамент дерегінше, тұрғындар мен заңды тұлғалардың шағымы бойынша жыл басынан бері «Сигма-ГАЗ» ЖШС, «ЖК Сервис» ЖК, «Есік су» МКК, «Таусамалы қызмет» МКК, «Іле су» МКК, «Балхашэнерго-1» ЖШС, «Аксу-2004» АӨК Қазақстан Республикасы Кәсіпкерлік Кодексі және «Табиғи монополиялар туралы» Қазақстан Республикасы Заңының орындалуын сақтауы бойынша жоспартан тыс тексерулер өтті.
Осыған байланысты, жыл басынан бастап «Сигма ГАЗ» ЖШС-не табиғи монополиялар туралы заңды бұзды деген айыппен жоспардан тыс 3 тексеріс жүргізілген. Тексеріс нәтижесі бойынша 21157945,17 теңге әкімшілік айыппұл салынып, заңсыздықты жою жөнінде нұсқау берілген.
«ЖК Сервис» жеке кәсіпкерлігі уәкілетті орган бекіткен тариф бойынша қызмет көрсету міндетін орындамағаны анықталған. Бұған қоса ол суды уәкілетті орган бекіткен 1 текше метріне 80,80 теңгеден жеткізудің орнына 150 теңгеден жеткізген. Осының нәтижесінде «ЖК Сервис» 159,9 мың теңге негізсіз табыс тапқан. Сонымен қатар, «ЖК Сервис» 2021 жылы тұтынушылармен қызмет көрсету туралы жеке келісімшарт жасаспағаны, ал 2022 жылы жасасқан келісімшарттары уәкілетті орган бекіткен типтік келісімшартқа сай емес екені анықталып, 2091907 теңге әкімшілік айыппұл салынған.
«Таусамалы» мемлекеттік-коммуналдық кәсіпорны сумен қамту және электр қуатын жеткізу қызметін уәкілетті орган бекіткен тариф бойынша көрсетпегені анықталып, 2394741 теңге әкімшілік айыппұл салынған.
2019 жылдың 24 ақпанында «Ақсу-2004» АӨК Алматы облысы бойынша табиғи монополиялар субъектілерінің мемлекеттік тіркелімінің жергілікті бөлімінен шығарылды.
Бұл ретте, «Ақсу-2004» АӨК Заңның 26-бабының 2-тармағы 1,3) тармақшасындағы көрсетілген нормаларын бұза отырып, 01.01.2019 жылдан бастап Еңбекшіқазақ ауданының шаруа қожалықтары үшін табиғи монополиялар субъектілерінің мемлекеттік тіркеліміне енгізілмей және бекітілген тарифсіз арналар арқылы су беру қызметтерін ұсынды.
Осылайша, ТМРК Алматы облысы бойынша департаменті ӘҚБтК-нің 164-бабының 3-бөлігіне сәйкес әкімшілік құқық бұзушылық туралы хаттамалар толтырылып, сондай-ақ ӘҚБтК-нің 462-бабының 1-тармағымен негізсіз табысты айқындау үшін тексеру жүргізуші органға құжаттарды ұсынбауына байланысты «Ақсу-2004» АӨК-не қатысты 345 000 теңгеге әкімшілік құқық бұзушылық туралы хаттама жасалып, ҚР заңнамасын бұзушылықтарды жою туралы нұсқама енгізілді.
Ал «Есік су құбыры», «Іле су» мемлекеттік-коммуналдық кәсіпорындары және «Балхашэнерго-1» жаупкершілігі шектеулі серіктестігі табиғи монополияларды бұзбаған болып шыққан.
