Референдумға дауыс берушілер арасында жастар көп
Қонаев қаласының тұрғындары бүгінгі маңызды шараға белсенді атсалысып жатыр, деп хабарлайды alataunews.kz.
Біз қазір 949 дауыс беру учаскесіне келдік. Дауыс берудің басталғанына әлі 1 сағат болған жоқ, дегенмен 50-ге жуық адам дауыс беріп үлгеріпті. Басым көпшілігі жастар.
Дауыс беру комиссиясының төрағасы Елдана Смаилованың мәліметінше, аталған участокке жалпы саны 2070 адам тіркелген. Оның 20-сы бірінші рет дауыс бергелі тұр екен.
Сонымен қатар, 949 аумақ бойынша, 7 адам үйден дауыс беруге өтініш білдірген. Комиссия мүшелері арнайы тасымалдау жәшігі арқылы үйлеріне барып, өз таңдауларын жасауға мүмкіндік береді.
Осы орайда, Қонаев қаласының тұрғыны, UIB университетінің 2 курс студенті Аяла Рахметолламен сұхбаттасып көрдік.
“Бұл менің кәмелеттік жасқа толғандағы бірінші дауыс беруім. Сайлау демократиялық елдің белгісі болғандықтан бұл әр азамат үшін өте маңызды. Сондықтан әр азамат өз таңдауын жасауға құқылы. Мен де осындай тарихи оқиғаның қатысушы болуға келдім”, - деді Аяла Рахметолла.
