Конституциялық реформалар – Әділетті Қазақстанды қалыптастырудың шешуші кезеңі

Қазақстан Республикасының Конституциясы – тәуелсіз мемлекетіміздің құқықтық негізін айқындайтын, қоғам дамуының стратегиялық бағытын белгілейтін басты құжат. Қоғамның саяси және әлеуметтік жаңғыруы жағдайында Ата Заңды заман талаптарына сай жетілдіру – тарихи қажеттілік. Осы тұрғыдан алғанда, Конституцияға енгізілген өзгерістер Қазақстанның жаңа даму кезеңіне нық қадам басқанын көрсетеді.
Конституциялық реформалардың басты мақсаты – әділетті, ашық және жауапты мемлекеттік басқару жүйесін қалыптастыру. Бұл өзгерістер билік пен қоғам арасындағы сенімді нығайтуға, азаматтардың құқықтары мен бостандықтарын қорғаудың тиімді тетіктерін енгізуге бағытталған. Мемлекет үшін ең басты құндылық – адам және оның қадір-қасиеті екені жаңартылған Конституцияда айқын көрініс тапты.
Ата Заңға енгізілген түзетулер билік тармақтары арасындағы тепе-теңдік пен тежемелік жүйені нығайтты. Президент өкілеттіктерінің қайта қаралуы, Парламенттің және мәслихаттардың құзыреттерінің кеңеюі өкілді биліктің рөлін арттыруға мүмкіндік берді. Бұл шешімдер мемлекеттік биліктің шектен тыс шоғырлануына жол бермей, саяси жүйенің орнықтылығы мен ашықтығын қамтамасыз етуге бағытталған.
Конституциялық реформалардың маңызды бағыты – адам құқықтарын қорғау тетіктерін күшейту. Конституциялық Соттың қайта құрылуы азаматтарға өз құқықтары мен бостандықтарын қорғау үшін тікелей жүгіну мүмкіндігін берді. Бұл – құқық үстемдігін нақты іске асыру жолындағы маңызды институционалдық қадам.
Сонымен қатар, Конституцияға енгізілген өзгерістер қоғаммен өзара диалогты дамытуға жаңа серпін берді. «Халық үніне құлақ асатын мемлекет» қағидаты конституциялық деңгейде бекітіліп, азаматтардың қоғамдық-саяси процестерге қатысу мүмкіндіктері кеңейді. Бұл азаматтық қоғам институттарының нығаюына және халықтың ел басқару ісіне белсенді араласуына құқықтық негіз қалыптастырады.
Конституциялық реформалар – бұл жекелеген нормаларды өзгерту ғана емес, мемлекетті басқару философиясын жаңарту. Жаңартылған Ата Заң әділеттілікке, жауапкершілікке және құқық үстемдігіне негізделген жаңа қоғамдық келісімнің іргетасын қалады.
Бүгінгі міндет – Конституцияда бекітілген қағидаттарды өмірде толық іске асыру. Әділетті Қазақстанды құру жолында әрбір мемлекеттік органның, әрбір азаматтың жауапкершілігі айрықша.

ТАЛҒАР АУДАНДЫҚ МӘСЛИХАТ ДЕПУТАТЫ АХМЕТЖАНОВ РУСТЕМ ҚАЖЫҚАНҰЛЫ