Олар Жеңісті жақындатты. Біз — сол ерліктің аманатына адал болуға тиіспіз

Іле ауданында 9 мамыр — Ұлы Жеңістің 81 жылдығына арналған ауқымды мерекелік іс-шара өтті.

Тағзым мен тағылымға толы жиында майдан даласында ерлік көрсеткен батырлар мен тылда тынымсыз еңбек еткен жандардың рухына құрмет көрсетілді. Аудан тұрғындары, ардагерлер, жастар мен қоғам өкілдері бір минут үнсіздікпен боздақтарды еске алып, Жеңіс рухына тағзым жасады.

Салтанатты шара барысында аудан әкімі сөз сөйлеп, Ұлы Жеңістің тарихи маңызына тоқталды. Бүгінгі бейбіт өмір — қан майданда жанын қиған ерлердің, тылда күн-түн еңбек еткен жандардың өлшеусіз ерлігінің нәтижесі екені атап өтілді.

Іле өңірінен майданға аттанған мыңдаған азаматтың ерлігі — ел жадында. Сол қаһарман ұрпақтың қайсарлығы мен отансүйгіштігі бүгінгі буын үшін мәңгілік үлгі.

Мерекелік кеште соғыс жылдарының әндері шырқалып, патриоттық композициялар қойылды. Ардагерлер мен тыл еңбеккерлеріне құрмет көрсетіліп, жылы лебіздер айтылды.

Ұлы Жеңіс — тарих қана емес. Ол — ұлттың рухы, елдің жады, ұрпақтың аманаты.