Қонаев тұрғындары туристік нысандарды тазалады
Бүгін Қонаев қаласының тұрғындары тарихи ескерткіштерді сақтап, қорғау мақсатында эконауқан өткізді. Шара Республика күніне орай ұйымдастырылған.
Науқанға қатысқан тұрғындардың айтуынша, табиғат аясындағы туристік нысандар - ертеңгі ұрпаққа мұра. Сол себепті оларды сақтап, қорғау - баршаға ортақ міндет.
"Тастарға жазу жазып, бүлдіріп жатқандар баршылық. Оларды өткеннің естеліктерін өшірмеуге шақырамыз. Бүгін тұрғындар жиналып, қала маңындағы туристік нысандарды тазарттық. Оның ішінде, Іле өзені бойындағы Тамғалы тас кешені де бар. Шараның Республика күніне орай өткені де тегін емес деп ойлаймыз. Аталған мереке туған жердің табиғатын қастерлеп, тәуелсіздігін құрмет тұтуға шақырады ғой", - деді Думан есімді тұрғын.
Науқан нәтижесінде 60 тонна қоқыс шығарылды.
