Пиротехника: мерекелік көңіл-күй – қауіпсіздіктен басталады

Қонаев қаласы Төтенше жағдайлар басқармасы ескертеді.
Жаңа жыл қарсаңында қалада түрлі пиротехникалық өнімдердің саудасы қыза түседі. Дегенмен жыл сайын дәрігерлер мен құтқарушылар қол және көз жарақаттары, күйіктер, сондай-ақ фейерверктерді дұрыс қолданбау салдарынан шыққан өрт оқиғаларын тіркеп отырады. Мереке қайғылы жағдайға ұласпауы үшін қауіпсіздік ережелерін сақтау өте маңызды.

Ең алдымен пиротехниканы тек арнайы дүкендерден  сатып алу қажет. Рұқсатсыз сатылым, куәлігі жоқ өнімдер және дұрыс сақталмаған фейерверктер жарылу қауіпін бірнеше есеге арттырады.

Пайдаланар алдында нұсқаулықты мұқият оқу керек. Көптеген жазатайым оқиғалар фейерверкті дұрыс орнатпау немесе тым жақыннан жағу нәтижесінде орын алады. Өнімді тегіс жерге қойып, фейрверк батареяларын қолда ұстамау қажет. Фейрверк тұтақышын жаққаннан кейін фейерверктің үстіне еңкеюге болмайды.

Пиротехниканы балаларға беруге қатаң тыйым салынады, фейерверк үшін тұрғын үйлерден, ағаштардан және автокөліктерден алыс ашық алаң таңдау қажет.

Сөнбей қалған пиротехниканы қайта жағуға болмайды. Оған 10–15 минут жақындамай күтіп, содан кейін ғана жоюға болады.

Қарапайым қауіпсіздік шараларын сақтау  әр адамға жаңа жылды жарқын әрі қауіпсіз өткізуге мүмкіндік береді.

Қонаев қаласы ТЖБ бас маманы Азаматтық қорғау аға лейтенанты  Әбділқақа Алмас Асылханұлы.