Қонаев қаласында Наурыз мерекесіне орай «Табиғат қанатында – Taza Life» экологиялық акциясы өтті
Қонаев қаласында Мемлекет басшысының «Таза Қазақстан» бағдарламасы аясында, Наурыз мерекесіне орай «Табиғат қанатында - Taza Life» атты экологиялық акция өтті. Шараны Алматы облыстық жастар ресурстық орталығы, білім басқармасы және орман шаруашылығы мекемелері ұйымдастырды.
Іс-шараның мақсаты - жастардың экологиялық мәдениетін қалыптастыру, құстарға қамқорлық жасауға және табиғатты аялауға баулу. Акция барысында қатысушылар өз қолдарымен жасаған құс ұяларын орнатты.
- "Көктеммен бірге туған өлкеге қайта оралған құстарға қамқорлық көрсету – қоршаған ортаға деген жауапкершіліктің айқын көрінісі. Елімізде мұндай ауқымды акция өткен жылы алғаш рет Алматы облысында өткізілді. Сол кезде мыңға жуық құс ұясы дайындалып, арнайы орындарға орнатылды. Биыл бұл көрсеткіш одан да жоғары. Бұл бастама өскелең ұрпақты табиғатты қорғауға, мейірімділік пен ізгілікке тәрбиелейді. Акция облыстың барлық аудандары мен қалаларында сәуір айының соңына дейін жалғасады", - деді облыстық Жастар ресурстық орталығының директоры Мақсат Кенешов.
- "Қоршаған ортаны қорғау – әр адамның міндеті. Еркіндіктің символына айналған құстарға көмегім тигеніне қуаныштымын", - деді Қонаев қаласындағы Шоқан Уәлиханов атындағы №2 гимназияның оқушысы Әлімжан Тұрдалиев.
