«Таза бейсенбі» акциясы Талғарда өтті
Талғар ауданында «AMANAT» партиясы Мемлекет басшысы Қасым-Жомарт Тоқаевтың бастамасымен жүзеге асып жатқан «Таза Қазақстан» ұлттық жобасы аясында кезекті «Таза бейсенбі» экологиялық акциясын ұйымдастырды.
Бұл жолы тазалық жұмыстары Талғар қаласының орталық бөлігінде, екі колледж бен аудандық аурухана маңында өтті. Күнделікті адам көп жүретін осы аумақта тұрмыстық қалдықтың жиналып қалғаны байқалды.
Акцияға 60-тан астам адам – партия мүшелері, мәслихат депутаттары, «Жастар рухы» жастар қанатының белсенділері, коммуналдық қызмет өкілдері, "Іле Алатау ұлттық паркінің" ұжымы мен қала тұрғындары қатысты.
Нәтижесінде шамамен 1,5 шақырым аумақ қоқыстан тазартылып, 3 тоннадан астам қалдық арнайы полигонға шығарылды. Тазалық жұмыстарына екі арнайы техника жұмылдырылды.
Партия өкілдерінің айтуынша, мұндай акциялар тек бір реттік шара емес, қаладағы санитарлық мәдениет пен тұрғындардың экологиялық жауапкершілігін арттыруға бағытталған тұрақты жұмыс болуы тиіс.
