Нұрлан Түймелиев Алматы облыстық мәслихатының депутаты болып сайланды
8 желтоқсанда Алматы облыстық мәслихатының №3 бірмандаттық округі бойынша өткен сайлауда Түймелиев Нұрлан Лесұлы айқын жеңіске жетті. Ол 12 491 сайлаушының дауысын жинап, өзге үміткерлерден озып шықты.
Қалған үміткерлер арасында Сәкен Жансаров 3 404 дауыс, ал Асхат Джамаров 2 376 дауыс жинады. Сонымен қатар, 869 сайлаушы «Барлығына қарсы» таңдауын жасады. Жалпы, сайлауға тіркелген 42 235 азаматтың 19 375-і қатысып, дауыс беру деңгейі 45,8%-ды құрады.
Нұрлан Түймелиев 1966 жылы дүниеге келген. Өмір жолын ішкі істер саласынан бастап, кәсіпкерлік және қоғамдық қызметте өзін танытқан тұлға. Ауған соғысы ардагерлері мен мүгедектерінің қайырымдылық қорының төрағасы ретінде, сондай-ақ округтік ардагерлер кеңесінің мүшесі ретінде ауданның әлеуметтік және экономикалық мәселелерін шешуге белсенді араласуда.
Ол өзінің сайлауалды бағдарламасында өңірдің инфрақұрылымын жақсарту, газдандыру, жаңа мектептер мен мәдениет үйлерін салу, жолдарды жөндеу, жастарды жұмыспен қамту, ауыл шаруашылығын қолдау секілді маңызды мәселелерге ерекше назар аударды.
Сайлау нәтижелері Нұрлан Түймелиевтің халық сеніміне ие болғанын дәлелдеді. Ол өз уәдесін орындап, өңірдің игілігі үшін аянбай еңбек етуге дайын. Тұрғындардың талап-тілегін тыңдап, аймақтың дамуына елеулі үлес қосу – жаңадан сайланған депутаттың басты міндеті.
«AMANAT» партиясы Алматы облыстық филиалының баспасөз қызметі.
