Тарихи таңдау алдындағы қоғам: референдум – халық билігінің көрінісі
2026 жылғы 11 ақпанда жарияланған Қазақстан Республикасы Президентінің 2026 жылғы 11 ақпандағы Жарлығы еліміздің саяси өміріндегі жаңа кезеңнің басталғанын айқындады. 15 наурызға белгіленген республикалық референдум – жай ғана саяси рәсім емес, ол мемлекеттің одан арғы даму бағытын айқындайтын тарихи белес.
Конституция – мемлекеттің іргетасы. Ол тек құқықтық нормалардың жиынтығы емес, елдің идеологиялық, әлеуметтік және саяси даму бағдарының айнасы. Қоғам өзгерген сайын, экономикалық және әлеуметтік қатынастар жаңарған сайын Ата Заң да заман талабына сай жетілдірілуі тиіс. Бұл – тұрақты дамудың табиғи шарты.
Президенттің референдум тағайындауы – реформалардың легитимділігін арттыруға бағытталған маңызды қадам. Себебі халықтың тікелей еркімен қабылданған шешім – ең жоғары демократиялық мандатқа ие. Бұл мемлекет пен қоғам арасындағы сенімді нығайтады.
Қоғамдық пікір көшбасшыларының пайымдауынша, конституциялық өзгерістер билік тармақтарының үйлесімді жұмыс істеуін қамтамасыз етіп, басқару жүйесінің тиімділігін арттыруға мүмкіндік береді. Сонымен қатар азаматтардың құқықтары мен бостандықтарын қорғау кепілдіктері нақтылауға бағытталған.
Референдум – ортақ жауапкершіліктің көрінісі. Әрбір дауыс – ел болашағына қосылған үлес. Сондықтан 15 наурыз – жай күнтізбелік дата емес, бұл – мемлекет тағдырына ықпал ететін шешуші сәт.
Алатау қаласы Ауған соғысы ардагерлерінің төрағасы
Молдабаев Канат
