95 жаста – жаңа өмір: кесусіз жасалған күрделі операция науқастың өмірін сақтап қалды
Алматы көпсалалы клиникалық ауруханасында дәрігерлер 1931 жылы туған, 95 жастағы науқасқа бірегей жоғары технологиялық ота жасады. Оған аорталық қақпақша транскатетерлік әдіспен (TAVI) ауыстырылды. Ең бастысы — операция кеуде қуысы ашылмай, жүрек тоқтатылмай жүргізілді.
Аорталық стеноз – егде жаста жиі кездесетін әрі өмірге қауіпті дерттердің бірі. Бұл ауру уақытында емделмесе, жүрек жеткіліксіздігіне әкеліп, науқастың өмірін қысқартады. Ал 90 жастан асқан адамдарға дәстүрлі ашық операция жасау өте қауіпті.
Осыны ескерген дәрігерлер науқасқа ең қауіпсіз әрі тиімді әдісті — аз инвазивті TAVI технологиясын таңдады.
Бұл әдіс кезінде жаңа қақпақша сан артериясы арқылы енгізілген жұқа катетердің көмегімен жүрекке жеткізіледі. Яғни, кеуде сүйегі кесілмейді және жасанды қан айналымы аппараты қолданылмайды. Мұндай тәсіл әсіресе жасы үлкен науқастар үшін аса маңызды.
TAVI әдісінің негізгі артықшылықтары:
• ағзаға түсетін жүктеменің аз болуы
• тез қалпына келу
• ауруханада жату мерзімінің қысқаруы
• операциялық тәуекелі жоғары науқастарға мүмкіндік беру
Ангиохирург Арман Садықовтың айтуынша, операция сәтті өткен:
«Науқастың жасы – үлкен қауіп факторы. Соған қарамастан, қазіргі медицинаның мүмкіндіктері бізге осындай күрделі жағдайларда да тиімді көмек көрсетуге жол ашады. TAVI – бұл ауыр операциясыз өмір сүруге берілген мүмкіндік. Біз жақсы нәтижеге қол жеткіздік».
Ал басқарушы компанияның бас директоры Жұмағали Исмаилов мұндай оталардың маңыздылығына тоқталды:
«Бұл – отандық медицинаның деңгейін көрсететін нақты нәтиже. Біздің мақсат – пациенттің жасына қарамай, барлығына сапалы әрі қауіпсіз медициналық көмек қолжетімді болуы».
Науқастың туыстары да дәрігерлерге алғысын білдірді:
«Біз мұндай жаста осындай ота жасауға болады деп ойламадық. Дәрігерлерге кәсібилігі мен жанашырлығы үшін, жақынымыздың өмірін ұзартқаны үшін шын жүректен алғыс айтамыз».
Бүгінде TAVI – жүрек қақпақшасы ауруларын емдеудегі ең заманауи әрі тиімді әдістердің бірі. Ол егде жастағы науқастарға жаңа мүмкіндік беріп, олардың өмір сапасын жақсартуға жол ашады.
