ЖАҢА КОНСТИТУЦИЯ – ӘДІЛ ҚОҒАМҒА БАСТАР ҚАДАМ
Қазіргі кезеңде елімізде жүзеге асып жатқан конституциялық өзгерістер – мемлекеттілікті нығайтуға, әділетті қоғам қалыптастыруға бағытталған маңызды тарихи шешім. Жаңа Конституция жобасы – уақыт талабынан туындаған құжат. Ол тек заңнамалық түзетулер жиынтығы емес, ел болашағын айқындайтын стратегиялық бағыт.
Ең алдымен, жаңа өзгерістерде адам құқығы мен қадір-қасиетіне ерекше басымдық берілген. Конституцияның басты қағидаты – «Адам және оның өмірі, құқықтары мен бостандықтары – мемлекеттің ең қымбат қазынасы» деген ұстаным нақты тетіктермен күшейтіліп отыр. Бұл – әлеуметтік әділеттілікті нығайтып, азаматтардың мемлекетке деген сенімін арттыратын маңызды қадам.
Сонымен қатар, билік тармақтары арасындағы тепе-теңдікті сақтау, Парламенттің рөлін күшейту, жергілікті басқару жүйесін жетілдіру бағытындағы өзгерістер демократиялық үдерістерді дамыта түседі. Азаматтардың саяси қатысу мүмкіндіктері кеңейіп, қоғамдық бақылау тетіктері айқындала түседі. Бұл – ашық әрі есеп беретін мемлекет қалыптастырудың негізі.
Жаңа Конституцияда әлеуметтік бағыт айқын көрініс тапқан. Тұрғын үйге, білімге, медициналық көмекке қолжетімділік мәселелері нақтылай түсіп, әлеуметтік жауапкершілік қағидаты күшейтіледі. Әсіресе, осал топтарды қорғау мен тең мүмкіндіктерді қамтамасыз ету басты назарда.
Сондай-ақ, ұлттық құндылықтар мен мемлекеттік тілдің мәртебесін сақтау мәселесі де ескерілген. Бұл – жаһандану жағдайында ұлттық болмысты қорғап, бірлікті нығайтуға бағытталған ұстаным.
Конституциялық реформаның бүкілхалықтық талқылаудан өтуі – оның ашықтығы мен демократиялық сипатының дәлелі. Әр азаматтың пікірі ескеріліп, ұсыныстар сараланып отыр. Бұл өзгерістер – халықтың қатысуымен қабылданатын тарихи шешім.
Жаңа Конституция – тұрақты даму мен өркендеудің берік негізі. Сондықтан аталған өзгерістерді қолдау – елдің болашағына, ұрпақ игілігіне жасалған саналы таңдау деп білеміз. Әділетті, қуатты және біртұтас Қазақстанды құру жолындағы бұл қадам баршамыздың ортақ мүддемізге сай келеді.
Қоғамдық пікір көшбасшысы
Лида Бузаева
