КОАЛИЦИЯ МҮШЕЛЕРІ ТАЛҒАР ЖОҒАРҒЫ МЕДИЦИНАЛЫҚ КОЛЛЕДЖІ СТУДЕНТТЕРІМЕН КЕЗДЕСТІ
«Әділетті және Прогрессивті Қазақстанның Халықтық Конституциясы үшін!» жалпыұлттық коалициясының мүшелері Талғар ауданындағы Талғар жоғарғы медициналық колледжі студенттерімен кездесу өткізді.
Жиында 2026 жылғы 15 наурызға белгіленген республикалық референдумға шығарылған жаңа Конституция жобасының негізгі бағыттары түсіндірілді. Коалиция өкілдері Президенттің бір реттік жеті жылдық мерзімі, партия мүшелігіне шектеу және кадрлық шешімдерді Құрылтай келісімімен қабылдау нормаларына тоқталды.
Коалиция мүшесі Нұргүл Тау жастардың ел болашағын айқындайтын тарихи кезеңге куә болып отырғанын атап өтті.
«Жаңа Конституция жобасы билікті жеке тұлғаға тәуелді етуді емес, институттарды күшейтуді көздейді. Бір реттік жеті жылдық мерзім мен саяси шектеулер – тұрақтылық пен әділеттіліктің кепілі. Бұл реформалар болашақ ұрпақ үшін берік құқықтық негіз қалыптастырады», – деді ол.
Кездесу барысында студенттер сұрақ қойып, пікір алмасты.
Өңірлік коалицияның баспасөз қызметі.
