Алматы облысында нашақорлыққа қарсы күрес мәселелері талқыланды
2026 жылғы 12 маусымда Қонаев қаласында Қазақстан Республикасы Ішкі істер министрлігінің бастамасымен нашақорлықтың алдын алу және есірткі қылмыстарына қарсы іс-қимыл жөніндегі Өңірлік ведомствоаралық штабтың кезектен тыс отырысы өтті.
Отырысқа Алматы облысы әкімінің міндетін атқарушы Қанат Болатұлы Есболатов төрағалық етті.
Іс-шараға Қазақстан Республикасы Ішкі істер министрлігінің Профилактикалық жұмысты үйлестіру комитетінің төрағасы Арман Амангелдіұлы Саданов, Қазақстан Республикасы Ішкі істер министрлігінің Есірткі қылмысына қарсы іс-қимыл комитеті төрағасының орынбасары Қуандық Жәнібекұлы Әлжанов, Ішкі істер министрлігінің өкілдері, есірткі құқық бұзушылықтарының алдын алу жөніндегі республикалық және өңірлік кеңестердің мүшелері, сондай-ақ мүдделі мемлекеттік органдар мен қоғамдық ұйымдардың өкілдері қатысты.
Отырыс барысында нашақорлықтың алдын алу, есірткі құралдарының заңсыз айналымына қарсы күрес, кәмелетке толмағандар мен жастардың есірткі ортасына тартылуының алдын алу, халыққа наркологиялық көмек көрсету, сондай-ақ аталған бағыттағы ведомствоаралық өзара іс-қимылдың тиімділігін арттыру мәселелері қаралды.
Интернет-ресурстар, әлеуметтік желілер мен мессенджерлер арқылы синтетикалық есірткілердің таралуына қарсы іс-қимыл шараларына, сондай-ақ жастар арасында есірткіге төзбеушілік көзқарасын қалыптастыру және салауатты өмір салтын насихаттау мәселелеріне ерекше назар аударылды.
Отырыс қорытындысы бойынша жауапты мемлекеттік органдарға профилактикалық жұмысты күшейтуге, ведомствоаралық өзара іс-қимыл тетіктерін жетілдіруге, есірткі қылмыстарына қарсы қабылданып жатқан шаралардың тиімділігін арттыруға және жастарды есірткінің заңсыз айналымына тартудан қорғауға бағытталған нақты тапсырмалар берілді.
Алматы облысы Полиция департаментінің баспасөз қызметі
