Бәйшешекті аялайық

Бәйшешек - Қызыл кітапқа енген гүл болғандықтан, оны сақтау маңызды. Алайда, көктемнің басында жаппай шығатын бәйшешекке «көз тігушілер» көп. 
Оны саудалап, табыс тапқысы келетіндер де осы кезде қарап қалмайды. Осындай, қыр гүлін бей-берекет жұлатындардың өрескел ісі тыйылмайтын болса, көктем хабаршысына айналған гүлдің суретін ғана көретін боламыз. Алматыда да ғұмыры қысқа бәйшешек гүлін саудаға салатындардың қарасы көбейді. Сатып алушылар да жетерлік.
Көбіне Іле, Жетісу, Күнгей Алатауының баурайында өсетін бәйшешек гүлінің қазіргі жайы ойлантпай қоймайды. Табиғатты қорғау полициясының қызметкерлері Қызыл кітапқа енген гүлді заңсыз жұлып, саудалаушыларға тыйым болмай отырғанын айтады. Егер бәйшешекті саудалағандардың гүлді табиғи қорықтардан жұлғаны анықталған жағдайда 3 мың айлық есептік көрсеткіш көлемінде айыппұл салынады. Бәйшешекті жұлған тұлғаның қылмыстық жазаға тартылуы, үш жылға дейін бас бостандығынан айырылуы мүмкін. Өсімдіктің бұл түрінің сиреп бара жатқанын ескерген табиғат қорғаушылары оны 2006 жылдан бері Қызыл кітапқа тіркеген екен. Сондықтан бәйшешекті жұлмаған жөн.

Жанаргүл Ниеталиева, 
Іле-Алатауы МҰТП
Түрген филиалының 
эколог-ағартушысы.