ІЛЕ АУДАНЫНДА «ДАЛА ДӘМІ» ЖӘРМЕҢКЕСІ ӨТІП ЖАТЫР
Бүгін, 23 қазанда, Республика күніне орай Алматы облысы Іле ауданының Өтеген батыр ауылында «Дала дәмі» атты ауыл шаруашылығы өнімдерінің жәрмеңкесі өтуде.
Сағат 10:00-де басталған шараға ауданның әр ауылдық округінен кәсіпкерлер қатысып, тұрғындарға өз өнімдерін ұсынып жатыр. Жәрмеңкеге «Алатау-Құс» ЖШС, «Сары-Бұлақ» ЖШС, «BS» ЖШС, «Боралдай-Нан» ЖШС, «Дәулет-Бекет» ЖШС және басқа да шағын кәсіпкерлер қатысуда.
Жалпы көлемі 30 тоннадан астам өнімді саудаға шығару жоспарланған. Тұрғындарға көкөністер мен жемістер, ет және сүт өнімдері, нан-тоқаш өнімдері және күнделікті тұтынуға қажетті өзге де азық-түлік тауарлары ұсынылуда.
Республика күніне орай бірқатар өнімдерге 10–15 пайыз көлемінде жеңілдіктер қарастырылған. Бұл тұрғындарға сапалы азық-түлік өнімдерін қолжетімді бағамен сатып алуға мүмкіндік береді.
«Дала дәмі» жәрмеңкесінің басты мақсаты – халықты қолжетімді азық-түлікпен қамтамасыз ету, жергілікті кәсіпкерлерді қолдау және отандық өнім өндірушілердің әлеуетін арттыру. Мұндай шаралар өндірушілер мен тұтынушылар арасындағы байланысты нығайтып, өңірдің кәсіпкерлік саласының дамуына ықпал етеді.
Мереке қарсаңында ұйымдастырылған жәрмеңке – ел бірлігі мен берекесін дәріптеп, отандық өнімді қолдауға бағытталған игі бастама.
