«Әкем – тірегім, анам – жүрегім» атты ашық есік күні өтті
2025 жылғы 22 мамырда Алатау қаласының «Отбасын қолдау орталығында» Президент Әкімшілігінің тапсырмасы негізінде және «Қазақстан балалары» бағдарламасы аясында 1 Маусым – Халықаралық балаларды қорғау күніне арналған іс-шаралар тұжырымдамасына сәйкес «Әкем – тірегім, анам – жүрегім» тақырыбында ашық есік күні ұйымдастырылды.
Іс-шараны «Алатау қаласы жұмыспен қамту және әлеуметтік бағдарламалар бөлімі» ММ, «Алатау қаласы ішкі саясат басқармасы», қаланың бас имамы, ақсақалдар алқасы, «Мансап» орталығының және «Отбасы банк» мамандары бірлесе өткізіп, қоғамдағы ата-ана рөлі мен отбасы құндылықтарын арттыру мақсатында жан-жақты пікір алмасу алаңы болды.
Ашық есік күнінің мақсаты – орталықтың жұмысы туралы тұрғындарға кеңінен ақпарат беру, әлеуметтік қолдау шаралары мен қызметтерді таныстыру, сонымен қатар тұрғындарға психологиялық және заңгерлік кеңестер ұсыну. Сондай-ақ, іс-шара отбасылық институтты нығайту, ата-ананың жауапкершілігін арттыру және әлеуметтік мәселелерді шешуге бағытталды.
Келушілер арасында тұрғын үй, медицина, психологиялық қолдау, білім беру, құқықтық мәселелер мен жұмыспен қамту бойынша кеңес алғандар көп болды. Әсіресе, баспана мәселесіне қатысты сұрақтар басымдыққа ие болды. Арнайы шақырылған «Отбасы банк» өкілдері мемлекеттік тұрғын үй бағдарламалары туралы жан-жақты ақпарат беріп, тұрғын үй алудың жолдарын түсіндірді.
Іс-шара барысында келіп түскен барлық өтініштер тіркеліп, тиісті мекемелердің қарауына жолданды. Қатысушылар ұйымдастырылған іс-шараға оң баға беріп, осындай кездесулердің жүйелі түрде өткізіліп тұруы маңызды екенін атап өтті.
Гульназ Кенесбаева,
Алатау қаласы әкімдігінің баспасөз хатшысы.
