Танымал өнер иесі өз таңдауын жасады
Талғар ауданындағы №833 референдум учаскесінде Қазақстанның еңбек сіңірген қайраткері, танымал өнер иесі Сәбит Әбдіхалықов алғашқылардың бірі болып дауыс берді.
– Бұл референдум еліміздің ертеңі үшін өте маңызды. Өйткені халқымыз жаңа Конституция үшін дауыс береді. Егер ол қабылданып жатса, еліміздің саяси жүйесі мүлде өзгереді, республикамызда бір палаталы Парламент құрылады. Ол заңдардың қабылдану мерзімін анағұрлым қысқартып, қазіргі ғылым мен білім, жаңа техника мен технология, жасанды интеллект дәуірінде қажетті құқықтық құжаттардың тез қолданысқа еніп, республикамыздың жан-жақты жедел дамуына жол ашады. Меніңше, мұны бәріміз қалаймыз. Халқымыздың, келешек ұрпағымыздың табысты, бақытты өмір сүруі бәріміздің арман-мақсатымыз. Сол себепті де мен бүгін алғашқылардың бірі болып, өзімнің азаматтық парызымды атқардым, – деді танымал актер.
Құтмағамбет ҚОНЫСБАЙ
