75 ЖЫЛ ШЕПТЕ — 75 ЖЫЛ ЕЛ ҚАУІПСІЗДІГІ ҮШІН ҚЫЗМЕТ

Іле ауданында Қазақстан Республикасы ҰҚК Шекара академиясы полигонының 75 жылдығына арналған салтанатты іс-шара өтті. Байкент ауылдық мәдениет үйінде ұйымдастырылған мерейтойда шекара қызметінің ардагерлері, әскери қызметшілер, сала мамандары мен қонақтар бас қосты.

Салтанатты жиында Іле ауданының әкімі Қайыржан Жақсымбетов шекара қызметінің ел қауіпсіздігін қамтамасыз етудегі маңызын атап өтті.

— «Шекара — мемлекеттің айбыны мен тұтастығының кепілі. 75 жыл ішінде бұл полигоннан елге адал қызмет ететін талай кәсіби маман даярланды. Сіздердің тәртіп пен Отанға деген адалдыққа негізделген еңбектеріңіз — кейінгі буынға үлгі. Мемлекет қауіпсіздігі жолындағы қызметтеріңіз үшін баршаңызға алғыс білдіремін», — деді аудан басшысы.

Іс-шара барысында ұлттық қауіпсіздік пен Отан алдындағы борышын адал атқарған бірқатар әскери қызметшілер мен қызметкерлер Іле ауданы әкімінің Алғыс хатымен марапатталды.

Мерейтой аясында патриоттық әндер шырқалып, Шекара академиясының оркестрі мен аудан өнерпаздары арнайы концерттік бағдарлама ұсынды. Кеш барысында әскери қызметтің мәртебесі, шекара шебіндегі жауапкершілік пен елге қызмет ету құндылығы кеңінен насихатталды.

Ел тыныштығы мен шекара қауіпсіздігі жолында қызмет етіп жүрген барлық мамандарға құрмет!