Кеген ауылында жаңа футбол және балалар ойын алаңы ашылды

Кеген ауылында бұқаралық спортты дамытуға және өскелең ұрпаққа қолайлы орта қалыптастыруға бағытталған шағын  футбол және балалар ойын алаңы ел игілігіне пайдалануға берілді.

Салтанатты шараға аудан әкімі Нұрбақыт Молдахметұлы Теңізбаев, аудан прокуроры Алмат Аметжанұлы Данилов, аудандық Ақсақалдар кеңесінің төрағасы Қуанышбек Жақыпбекұлы Төлепбердиев, спортшылар, еңбек ардагерлері, қоғамдық ұйым өкілдері және ауыл тұрғындары қатысты.

Шара барысында жаңа нысанның ашылу рәсімі өтіп, құрметті қонақтардың қатысуымен қызыл лента қиылды.

Ақ жаулықты әжелер шашу шашып, жаңа спорт алаңына ақжолтай тілектерін білдірді.

Жаңа футбол алаңы – балалар мен жасөспірімдердің спортпен тұрақты айналысуына, бос уақытын тиімді өткізуіне, салауатты өмір салтын қалыптастыруына үлкен мүмкіндік.

Ал балалар ойын алаңы бүлдіршіндердің қауіпсіз әрі көңілді демалысына арналған жайлы орынға айналмақ.

Салтанатты шарада аудан әкімі Нұрбақыт Молдахметұлы жаңа нысанның ауыл балалары үшін маңыздылығына тоқталып өтті.

Шара барысында Қазақстан Республикасының спорт шебері, Қазақстанның 4 дүркін чемпионы, 2026 жылғы Азия чемпионы Дәурен Қадыр Ринатұлы құттықтау сөз сөйлеп, жас спортшыларға сәттілік тіледі. 
Ал, аудандық Ақсақалдар кеңесінің төрағасы Қуанышбек Жақыпбекұлы ақ батасын берді.

Сондай-ақ жаңа алаңның алғашқы доп тебу рәсімі ұйымдастырылып, аудан әкімі мен құрметті қонақтар алаңға шығып,  алғашқы допты тепті.

Футболдан алғашқы жолдастық кездесу өтті.

Жас спортшылар жасыл алаңда өзара бақ сынасып, көрермендерге тартысты ойын сыйлады.