VI Дүниежүзілік көшпенділер ойындарындағы Қазақстанның аламан бәйгедегі триумфы
Қырғызстанда өтіп жатқан VI Дүниежүзілік көшпенділер ойындарында Қазақстан құрамасы аламан бәйгеден зор жеңіске жетті.
25 шақырымдық қашықтықта қазақстандық шабандоздар үздік нәтиже көрсетіп, тұғырдың үш сатысын да толық иеленді. Ең бастысы — жүлдегерлердің үшеуі де Алматы облысының спортшылары.
Мәре сызығын бірінші болып Нұрасыл Бекбатыр «Айман» атты сәйгүлікпен қиды. Оның сенімді жеңісі Қазақстан қоржынына алтын медаль салды.
Келесі болып мәреге Асылжан Төлеген «Көксерек» атты тұлпарымен жетіп, күміс жүлдені иеленді. Бұл жарыстағы Қазақстанның екінші медалі болды.
Ал үшінші болып Ерсұлтан Жарқын «Қарағаш» атты сәйгүлікпен мәреге жетіп, қола медальді жеңіп алды.
Алматы облысы үшін бұл нәтиже айрықша мәнге ие. Өңір өкілдері ұлттық құраманың медаль қоржынына өз үлестерін қосып қана қоймай, ат бәйгесіндегі ең беделді әрі күрделі жарыстардың бірі — аламан бәйгеде тұғырдың барлық үш сатысын толық иеленді.
Әрбір жеңістің артында — талай шақырымдық жаттығу, сәйгүліктің төзімділігі, шабандоздың шеберлігі және жарыстың соңғы метріне дейін жоғары қарқынды сақтай білу қабілеті жатыр.
Қазақ халқының мәдениетінде ат спортының орны айрықша. Көшпенділер үшін жылқы тұрмыстың ажырамас бөлігі болса, атқа міну өнері мен тұлпарды баптау шеберлігі ұрпақтан ұрпаққа жалғасып отырған.
Бүгінде бұл дәстүр халықаралық спорт аренасында жаңа мазмұнмен жалғасын тауып келеді.
Жалпы, VI Дүниежүзілік көшпенділер ойындары ұлттық спорттың тарих пен қазіргі заманды, мәдени мұра мен жоғары жетістіктер спортын тоғыстыра алатынын тағы бір мәрте көрсетті. Ал аламан бәйгедегі бүгінгі жеңіс — Қазақстандағы ат спорты мектебінің жоғары деңгейінің жарқын дәлелі.
VI Дүниежүзілік көшпенділер ойындарының төртінші жарыс күнінің қорытындысы бойынша Қазақстан құрамасы жалпыкомандалық медальдар есебінде көш бастап келеді. Ұлттық құраманың қоржынында 25 алтын, 13 күміс және 17 қола медаль — барлығы 55 жүлде бар.
Лилиана ШТОГРИНА.
