Балалық шақ мекені
Алматы қаласында «Ауыл» партиясының ұйымдастыруымен «Балалық шақ мекені» атты ауқымды республикалық акция өтті.
Мемлекет басшысы Қасым-Жомарт Тоқаев өскелең ұрпақтың құқықтарын қорғау мен олардың игілігін қамтамасыз ету мәселесін әрдайым ерекше бақылауда ұстап келеді. Президент бұл бағытта: «Өскелең ұрпақтың тағдырына бейжай қарамау – мемлекеттің ғана емес, бүкіл қоғамның міндеті. Әрбір бала – біздің еліміздің болашағы. Сондықтан олардың қауіпсіз, бақытты әрі толыққанды дамуы үшін барлық жағдайды жасау біздің перзенттік те, азаматтық та парымыз», - деп үнемі атап өтеді.
Осы ретте, Халықаралық балаларды қорғау күні қарсаңында Алматы қаласында «Балалық шақ мекені» атты республикалық акцияға старт берілді. Аталған жоба Мемлекет басшысының саясатын іс жүзінде ілгерілету мақсатында жүзеге асырылуда. Жобаның негізгі мақсаты – өскелең ұрпаққа мерекелік көңіл-күй сыйлау, отбасылық құндылықтарды дәріптеу және балалардың әлеуметтік әл-ауқатына қоғам назарын аудару болып табылады.
Мерекелік шара аясында Алматы қаласының Grand Park сауда және ойын-сауық кешенінде қызықты мәдени-танымдық бағдарламалар, шығармашылық конкурстар мен ойын-сауық бағдарламалары ұйымдастырылды. Конкурстарға белсенді қатысқан барлық бүлдіршіндер мен түрлі бәсекелерде жүлделі орын алған жеңімпаздарға ойыншықтар, сыйлықтар мен әуе шарлары табысталды.
«Ауыл» партиясы Алматы қалалық филиалының төрағасы Ахметбек Қоңырбаев бұл бастаманың тәрбиелік мәні жоғары екенін атап өтті: ««Ауыл» партиясы үшін отбасылық құндылықтар мен балалардың бақытты балалық шағы – қашанда басты назарда. Бұл акция – әрбір баланың қоғамда өз орны бар екенін, олардың құқықтары мен армандары біз үшін маңызды екенін көрсетудің тамаша тәсілі. Интерактивті конкурстар арқылы біз балалардың белсенділігін арттырып, бойындағы таланттарын шыңдауды көздейміз. Әрбір кішкентай жеңіс пен марапат баланың болашаққа деген сенімін нығайтады».
Ұйымдастырушылар бұл бастама қоғамдағы отбасы институтын нығайтуға және әрбір баланың бақытты балалық шаққа құқығы бар екенін көрсетуге бағытталған маңызды қадам болатынына сенімді.
«Ауыл» партиясының баспасөз қызметі.
