Әдеп кодексі – мемлекеттік қызметтің басты қағидаты
Мемлекеттік қызмет – халық пен мемлекеттің арасындағы сенімді байланысты қалыптастыратын жауапты сала. Сондықтан мемлекеттік қызметшінің кәсіби біліктілігімен қатар, оның әдептілігі, жауапкершілігі, адалдығы және азаматтармен қарым-қатынас мәдениеті ерекше маңызға ие. Осы талаптарды жүйелейтін негізгі құжат – Қазақстан Республикасы мемлекеттік қызметшілерінің Әдеп кодексі.
Қазақстан Республикасы Президентінің 2015 жылғы 29 желтоқсандағы №153 Жарлығымен бекітілген мемлекеттік қызметшілердің Әдеп кодексі мемлекеттік қызметшілердің қызметтік міндеттерін орындау кезіндегі және қызметтен тыс уақыттағы мінез-құлық стандарттарын айқындайды. Кодекстің негізгі мақсаты – мемлекеттік қызметтің беделін арттыру, қоғамның мемлекеттік аппаратқа деген сенімін нығайту және мемлекеттік қызметшілер арасында жоғары әдеп мәдениетін қалыптастыру.
Мемлекеттік қызметші өзінің лауазымдық міндеттерін атқару барысында заңдылық, әділдік, ашықтық және бейтараптық қағидаттарын басшылыққа алуы тиіс. Ол азаматтардың өтініштері мен ұсыныстарына мұқият қарап, әрбір адамға құрметпен әрі сыпайылықпен қарауы қажет. Қызметтік өкілеттіктерді жеке мүдде үшін пайдалануға жол бермеу, сыбайлас жемқорлықтың кез келген көрінісіне қарсы тұру және мемлекеттік мүлікке ұқыпты қарау – әрбір мемлекеттік қызметшінің азаматтық әрі кәсіби борышы.
Әдеп кодексінің талаптары тек жұмыс орнында ғана емес, қызметтен тыс уақытта да сақталуы тиіс. Мемлекеттік қызметші күнделікті өмірінде де қоғам алдында жоғары мәдениет пен адамгершіліктің үлгісін көрсетуі қажет. Себебі оның іс-әрекеті мен мінез-құлқы мемлекеттік қызметтің беделіне тікелей әсер етеді.
Қазіргі таңда мемлекеттік қызметтің басты қағидаттарының бірі – «Адал азамат – Адал еңбек – Адал табыс» құндылықтарын дәріптеу болып табылады. Бұл қағидаттар мемлекеттік қызметшінің кәсіби қызметінде адалдық пен жауапкершілікті, әділ шешім қабылдауды және халықтың сеніміне лайық қызмет етуді көздейді. Әдеп кодексінің талаптарын мүлтіксіз сақтау – осы құндылықтарды іс жүзінде жүзеге асырудың маңызды тетігі.
Әдеп нормаларын сақтау – әрбір мемлекеттік қызметшінің заң алдындағы ғана емес, қоғам алдындағы жауапкершілігінің де көрінісі. Азаматтармен қарым-қатынастағы сыпайылық, қызметтік міндеттерді адал орындау және қабылданған әрбір шешім мемлекеттік органдардың оң беделін қалыптастыруға ықпал етеді.
Қорытындылай келе, Әдеп кодексі – мемлекеттік қызметшінің кәсіби қызметіндегі басты моральдық әрі құқықтық бағдар. Оның талаптарын сақтау мемлекеттік қызметтің тиімділігін арттырып қана қоймай, халықтың мемлекеттік органдарға деген сенімін нығайтуға ықпал етеді. Сондықтан әрбір мемлекеттік қызметші Әдеп кодексінің қағидаттарын күнделікті қызметінде басшылыққа алып, заңдылықты, әділдікті, адалдықты және жоғары әдеп мәдениетін берік ұстануы тиіс. Сонда ғана халыққа сапалы мемлекеттік қызмет көрсетіліп, құқықтық мемлекет қағидаттары нығайып, еліміздің тұрақты дамуына берік негіз қаланады.
Іле ауданы әкімі аппаратының
әдеп жөніндегі уәкілі
Асқар САДЫҚОВ
