NIS оқушылары халықаралық білімдодасында жеңіс тұғырын бағындырды
Назарбаев Зияткерлік мектептерінің оқушылары Дубайда өткен 57-ші Халықаралық химия олимпиадасында (IChO) жоғары нәтиже көрсетіп, Қазақстан қоржынына екі алтын және бір күміс медаль салды.
Елордадағы физика-математика бағытындағы Назарбаев Зияткерлік мектебінің оқушылары Кирилл Ким мен Абылай Қабдулхадыр алтын медаль иегері атанды. Айта кетерлігі, Кирилл IChO-да осымен екінші рет алтын медаль жеңіп отыр, ал Абылай өткен жылы осы халықаралық додада күміс медаль иеленсе, биыл нәтижесін жақсартып, алтын жүлдеге қол жеткізді.
Күміс медальді Алматы қаласындағы химия-биология бағытындағы NIS оқушысы Еңлік Бақытбекова иеленді. Еңлік те бұған дейін бірнеше мәрте халықаралық және республикалық олимпиадалардың жеңімпазы атанған еді.
Айта кетейік, биылғы олимпиадаға әлемнің 90-нан астам елінен 360-тан аса үздік жас химик жиналды. Қатысушылар бірнеше күн бойы органикалық, аналитикалық және физикалық химия бойынша білімдерін теориялық және практикалық турларда сынады.
