Халықаралық сарапшылыр Назарбаев Зияткерлік мектебін қайта аккредиттеу жұмысын өткізді
Алматы-Наурызбай Зияткерлік мектебінде Халықаралық мектептер кеңесі (CIS) командасының мектептің халықаралық білім беру стандарттарына сәйкестігін қайта аккредиттеу бойынша сапары аяқталды. Апта бойы сарапшылар сабақтар мен сыныптан тыс іс-шараларға қатысып, үйірмелер мен секциялардың жұмысымен танысты, сондай-ақ оқушылармен, мектеп ұжымымен және ата-аналармен кездесті.
Сапардың соңғы күні сарапшылар мектеп әкімшілігі мен қызметкерлерімен қорытынды кездесу өткізді. Мектеп жұмысына жан-жақты талдау жасап, оны одан әрі жетілдіруге қатысты ұсыныстар берді.
Мектеп қауымдастығының белсенділігі, үздіксіз даму мен инновацияларға ашықтығы, оқушылардың білім алуға деген қызығушылығы және жалпы мәдениеті ерекше атап өтілді.
Сарапшылар оқыту мен бағалау, оқушылардың әл-ауқаты (well-being), мұғалімдердің кәсіби дамуы және халықаралық бағыттылық сияқты оң тұстарға назар аудара отырып, сапалы білім беруге деген ұстанымды сақтау, оқытудағы инновациялық тәсілдерді дамыту, үздіксіз жетілдіруге ұмтылу және берілген ұсыныстарды жүзеге асыруға шақырды.
