NIS Алматы-Наурызбай оқушылары GENIUS Olympiad-2026 дүниежүзілік олимпиадасында күміс жүлдеге ие болды
Алматы-Наурызбай Назарбаев Зияткерлік мектебінің оқушылары АҚШ-та өткен беделді халықаралық экологиялық байқау GENIUS Olympiad-2026 олимпиадасында Қазақстан намысын абыроймен қорғады. Байқауға әлемнің 80-нен астам елінен дарынды оқушылар қатысты.
Мектеп оқушылары Тимур Сакиев, Зере Нұрбол және Ализа Стыбаева өздерінің инновациялық жобаларын ұсынып, халықаралық қазылар алқасының жоғары бағасына ие болды.
«Artificial Intelligence» санатында 10-сынып оқушысы Тимур Сакиев биология, жасанды интеллект және экологиялық шешімдер тоғысындағы ғылыми жобасын таныстырып, күміс медаль иеленді.
Ал 11-сынып оқушылары Зере Нұрбол мен Ализа Стыбаева «Entrepreneurship» санатында экологиялық мәселелерді шешуге бағытталған кәсіпкерлік жобасын ұсынып, ІІ орын жүлдегері атанды.
GENIUS Olympiad-2026 дүниежүзілік олимпиадасы АҚШ-тың Нью-Йорк штатындағы Рочестер қаласында, St. John Fisher University базасында өтті. Олимпиаданың серіктестерінің бірі — Rochester Institute of Technology (RIT). Университет күміс жүлдегерлерге бакалавриат бағдарламасына түскен жағдайда жыл сайын 18 000–20 000 АҚШ доллары көлемінде шәкіртақы алу мүмкіндігін ұсынады. Бұл шәкіртақы студент бакалавриатта оқуын табысты жалғастырған барлық кезеңде төленеді.
GENIUS Olympiad олимпиадасының миссиясы жастардың экологиялық бастамаларын қолдауға және БҰҰ-ның Тұрақты даму мақсаттарына сәйкес келетін жобаларды дамытуға бағытталған. Байқау әлемнің түкпір-түкпірінен келген жас зерттеушілер мен жаңашылдарды біріктіріп, тұрақты болашақ үшін тиімді шешімдер жасауға мүмкіндік береді.
