«Ұранды елдің – ұрпағы қайсар»: Алатауда Отан қорғаушылар күніне арналған мерекелік концерт өтті
2025 жылдың 6 мамырында Алматы қаласы Алатау ауданы Еңбек ықшам ауданындағы №7 орта мектепте Қазақстан Республикасының Отан қорғаушылар күні мен Қарулы Күштерінің құрылғанына арналған «Ұранды елдің – ұрпағы қайсар» атты салтанатты мерекелік концерт ұйымдастырылды.
Шара Қазақстан Республикасының Мемлекеттік Гимнінің орындалуымен және мерекенің ресми ашылуымен басталды. Жүргізушілер елін сүйген ерлердің ерлігі мен батырлығын дәріптеп, көрермендерге патриоттық рух сыйлайтын жүрекжарды лебіздерін білдірді.
Салтанатты кештің алғашқы сөзі Алатау қаласының әкімі Өтенов Әркен Хамитұлына берілді. Ол Отан қорғаушылардың ел қауіпсіздігін қамтамасыз етудегі маңызын ерекше атап өтіп, қоғам алдындағы еңбектері үшін бірқатар азаматтарды арнайы алғыс хаттармен марапаттады.
Мерекелік концерт барысында отансүйгіштікке және патриоттық тәрбиеге бағытталған мазмұнды өнер бағдарламасы ұсынылды. Дәстүрлі әншілер мен өнерпаздар – сахна төрінде өнер көрсетіп, көрермендердің ыстық ықыласына бөленді. Олардың орындауындағы әндер мен көркем қойылымдар жұртшылықтың ерекше көңілін жаулап, мерекелік кештің сәнін арттырды.
Іс-шара жоғары деңгейде ұйымдастырылып, жиналған қауымның зор алғысына ие болды. Бұл концерт – ел қорғаушыларға деген құрметтің, бейбіт күннің бағасын білудің және жас ұрпақты Отансүйгіштікке тәрбиелеудің жарқын үлгісіне айналды.
Гүлназ Кеңесбаева , Алатау қаласы әкімінің баспасөз хатшысы.
