Отансүйгіштікке тәрбиелеудің маңызы зор
Қазіргі таңда жас ұрпақты отансүйгіштікке, тәртіпке және азаматтық жауапкершілікке тәрбиелеу – мемлекеттік маңызы бар міндеттердің бірі. Осы бағытта жалпы білім беретін мектептерде құрылған «Жас шекарашы» әскери-патриоттық сыныптары өскелең ұрпақтың бойында елге деген сүйіспеншілікті, әскери қызметке қызығушылықты және ұлттық құндылықтарды қалыптастыруда маңызды рөл атқарады.
Жас ұрпақты отансүйгіштікке тәрбиелеу мен әскери қызметтің маңыздылығын түсіндіру мақсатында Қызметтік кинология басқармасы тарапынан «Жас шекарашы» әскери-патриоттық сыныптарымен жүйелі түрде жұмыс ұйымдастырылуда.
Аталған іс-шаралардың негізгі мақсаты – оқушылардың Қазақстан Республикасының Мемлекеттік шекарасын қорғау ісіне деген қызығушылығын арттыру, шекара қызметінің беделін көтеру және болашақта әскери мамандықты саналы түрде таңдауға бағыт беру. Бұл жұмыстар білім беру ұйымдарымен өзара ынтымақтастық аясында жүзеге асырылуда.
Кездесулер барысында оқушыларға шекара қызметінің, оның ішінде қызметтік кинология саласының ерекшеліктері, қызметтік иттердің шекараны күзетудегі рөлі мен маңызы туралы кеңінен ақпарат беріледі. Қызметтік кинология басқармасының әскери қызметшілері жасөспірімдерге қызметтік иттерді даярлау, оларды қолдану бағыттары жөнінде түсіндірме жұмыстарын жүргізуде.
Кәсіби бағдар беру аясында оқушыларға әскери оқу орындары, шекара қызметіндегі кинолог мамандығының артықшылықтары мен болашағы туралы мәлімет ұсынылады. Бұл жұмыстар жас шекарашылардың бойында әскери қызметке деген қызығушылықты арттыруға оң әсерін тигізуде.
Жалпы, Қызметтік кинология басқармасы тарапынан «Жас шекарашы» әскери-патриоттық сыныптарымен жүргізіп жатқан жұмыстар өскелең ұрпақты Отанын қорғауға дайын, тәртіпті және жауапкершілігі жоғары азамат етіп тәрбиелеуге бағытталған.
Дарын Мырзагулов,
ҚР ҰҚК ШҚ Қызметтік кинология басқармасының қызметкері.
