Іле ауданында Білім күніне арналған іс-шаралар өтті
1 қыркүйек – Білім күніне орай Іле аудандық полиция басқармасының қызметкерлері аудан мектептерінде ұйымдастырылған салтанатты іс-шараларға қатысып, оқушыларды жаңа оқу жылының басталуымен құттықтады.
«Заң және тәртіп» қағидатын ілгерілету және жасөспірімдер арасында құқықтық мәдениетті қалыптастыру мақсатында полиция қызметкерлері оқушылармен бірқатар профилактикалық және танымдық іс-шаралар өткізді.
Бастауыш сынып оқушыларына Қазақстан Республикасы Ішкі істер министрлігі әзірлеген арнайы боямақтар таратылды. Бұл материалдар балаларға қауіпсіздік талаптары мен қоғамдық тәртіп ережелерін ойын түрінде түсіндіруге бағытталған.
Сондай-ақ полиция кадет сыныптарының оқушыларымен «Полиция және балалар» тақырыбында сабақ ұйымдастырылып, құқықтық сауаттылық, полиция мен қоғам арасындағы өзара сенімді нығайту және патриоттық тәрбие мәселелері талқыланды.
Кездесу барысында тәртіп сақшылары оқушыларға жол қозғалысы ережелерін қатаң сақтау, үйден мектепке дейінгі қауіпсіз бағытты таңдау және білім беру ұйымдарындағы қауіпсіздік талаптарын сақтау қажеттігін еске салды.
Мұндай іс-шаралар өскелең ұрпақтың құқық қорғау органдарына деген сенімін арттыруға, құқықтық мәдениетін қалыптастыруға және жеке қауіпсіздікке жауапкершілікпен қарауына ықпал етеді.
