Құрылтай - елдік ойдың ортақ алаңы

Құрылтайды мен қоғамдағы маңызды мәселелерді талқылап, елдің бүгінгі тынысын бағамдап, болашаққа қатысты ой бөлісетін ортақ алаң ретінде қабылдаймын. Оның мәні - әртүрлі пікірді тыңдап, қоғам үшін өзекті мәселелерге байыппен қарауында.

Бүгінде Қазақстанның дамуы тек экономикалық көрсеткіштермен өлшенбейді. Білім, мәдениет, ұлттық құндылықтар, жастардың тәрбиесі мен азаматтардың қоғамдық жауапкершілігі де ел болашағына тікелей әсер етеді.

Кітапхана саласының маманы ретінде білім мен мәдениеттің қоғам өміріндегі маңызын ерекше атап өткім келеді. Қазіргі таңда ақпарат көп, алайда сол ақпаратты дұрыс саралап, қажеттісін таңдай білу маңызды. Осы тұрғыдан алғанда кітапхана - тек кітап сақтайтын орын емес, білім мен ойдың, мәдениет пен пікір алмасудың орталығы.

Ұлттық құндылықтарды сақтау да өткенді қайталаумен шектелмеуі керек. Тарихымызды, әдебиетімізді, тіліміз бен мәдениетімізді бүгінгі ұрпақтың дүниетанымымен сабақтастыра білу қажет.

Меніңше, Құрылтайдың маңызы да осындай ортақ мәселелерді талқылап, қоғамның әр саласына қатысты ойларды саралауда жатыр. Елдің болашағы білімді, мәдениетті және жауапкершілігі жоғары азаматтармен қалыптасады.

Ғалия Тоқабаева,
Алматы  облыстық  орталық  әмбебап  кітапханасының  директоры.