Алматы облысының тұрғыны сайлау учаскелерінің ерекше қажеттілігі бар азаматтарға қолжетімділігін тексерді
Құрылтай депутаттарын сайлау күні еліміздегі сайлау учаскелерінде 90 мыңнан астам ерекше қажеттілігі бар азамат дауыс береді деп күтілуде. Сондықтан олар үшін қолайлы жағдай жасау – басты міндеттердің бірі.
Еңбекшіқазақ ауданы Есік қаласының тұрғыны Светлана Зеленская сайлау учаскелерінің қолжетімділігін өз көзімен көріп, бағалады. Ол №120 сайлау учаскесіне инватаксимен келді.
«Мен сайлауға алғаш рет қатысып тұрған жоқпын. Бұған дейін Мемлекет басшысын, Парламент депутаттарын сайлауда және референдумда дауыс бердім. Әр дауыс маңызды деп санаймын. Белсенділік таныту арқылы еліміздің дамуына өз үлесімізді қосамыз. Ерекше қажеттілігі бар азаматтарға таксиден бастап, көмекке шақыру батырмалары мен тұтқаларға дейін барлық қолайлы жағдай жасалғанын атап өткен жөн»,– деді Светлана Зеленская.
Ол сайлау учаскесінде пандустардың, арнайы дауыс беру кабиналарының және ерекше қажеттілігі бар, оның ішінде арбамен жүріп-тұратын азаматтарға бейімделген ақпараттық стендтердің бар екенін атап өтті.
Айта кетейік, арнайы мониторинг топтары сайлау учаскелерінің ерекше жандарға қолжетімділігін тексерді. Мамандар олардың учаскеге өздігінен кіріп-шығып, ғимарат ішінде еркін қозғалып, дауыс бере алу мүмкіндігін бағалады.
Атап айтқанда, пандустар мен тұтқалардың болуы және олардың жағдайы, көмекке шақыру түймелері, арнайы автотұрақ пен арбамен жүріп, бұрылуға ыңғайлы алаңдар тексерілді. Басқа да кедергілердің алды алынып, табалдырықтардың қолайлы болуына, санитарлық бөлмелердің қолжетімділігіне назар аударылды. Мониторинг барысында анықталған кемшіліктердің барлығы жойылды. Сайлау учаскелері барлық азаматтарды қабылдауға дайын.
Алматы облысының ӨКҚ
