"Менің елім - Менің туым!" акциясы Қонаев қаласында жалғасты

25 қазан - Республика күніне орай, еліміздің аумақтарында "Менің елім - Менің туым!" акциясы өтіп жатыр.

Бүгін бұл науқан Қонаев қаласында жалғасын тапты. Қала жастары Іле өзенінің бойында орналасқан "Тамғалы тас" шатқалына барып, бейнежазба түсірді.

Шараға таңнан дайындалып, белсене қатысқан жастың бірі - Ақерке Мақсатқызы. Ол мұндай науқандарға қатысу әр қазақстандықтың парызы деген пікірде.

"Тамғалы таста акция өткізу үшін 100-ге жуық жас жиналдық. Негізінен әр қазақстандық елі үшін қызмет етіп, айтулы мерекелерді құрметтеп, тойлатуы тиіс деп ойлаймын. Көк тудың көк аспанда қалықтап тұрғаны әрқашан бойымызға мақтаныш сезімін ұялатады. Сондықтан бұл акцияның бірлікке, татулыққа, патриоттыққа үндеуде маңызы зор", - деді ол.

Жалпы бүгін Тамғалы таста 15 байрақ көкке көтерілді. Ертең Қонаев қаласында 1000-нан астам адамның қатысуымен тағы бір науқан өтпек. 

Айта кетейік, 1990 жылы қазан айының 25-і күні Қазақ КСР Жоғарғы Кеңесінің шешімімен «Қаз КСР-нің мемлекеттік егемендігі туралы» декларация қабылданды.

#RepublicDay
#kzdayrepublic
#РеспубликаКүні