ІЛЕ АУДАНЫНДА БІР КҮНДЕ 64 ТОННА ҚОҚЫС ШЫҒАРЫЛДЫ

13 тамызда Іле ауданында кезекті сенбілік өтті. Оған 3 011 адам қатысып, 25 арнайы техника жұмылдырылды.

«Таза Қазақстан» экологиялық акциясы аясындағы тазалық жұмыстары ауданның елді мекендеріндегі көшелерді, қоғамдық орындар мен өзге де аумақтарды қамтыды. Нәтижесінде бір күнде 25 гектар жер тазартылып, 64 тонна қоқыс шығарылды.

Іле ауданы әкімінің орынбасары Мұхамедғаріп Құрманғалиевтің айтуынша, мұндай жұмыстардың негізгі мақсаты – бір күндік тазалық шарасын өткізу ғана емес, елді мекендерде тазалық мәдениетін қалыптастыру.

— Тазалық – тек коммуналдық қызметтердің міндеті емес, бұл – баршаға ортақ жауапкершілік. Сенбілік барысында тұрғындарымыз бен мекеме қызметкерлерінің белсенділік танытып отырғаны қуантады. Біздің міндет – елді мекендерді бір күн тазалап қана қою емес, тазалықты күнделікті қалыпқа айналдыру. Сондықтан бұл бағыттағы жұмыстар тұрақты бақылауда болады, – деді Мұхамедғаріп Құрманғалиев.

Ауданда санитарлық тазалық пен абаттандыру жұмыстары жүйелі түрде жалғасады. Анықталған кемшіліктер бойынша жауапты мекемелерге тиісті тапсырмалар беріліп, олардың орындалуы бақылауға алынады.