Спорт шебері Нұрсұлтан Орынбасаров өз таңдауын жасады

Бүгін С.Нұрмағамбетов атындағы «Сағадат батыр» спорт клубының негізін қалаушы, ММА шебері, грепплингтен Азия чемпионы, джиу-джитсудан республикалық және халықаралық турнирлердің чемпионы Нұрсұлтан Орынбасаров Ащыбұлақ ауылдық округіндегі №1058 сайлау учаскесіне келіп, Құрылтай депутаттарының сайлауында өз таңдауын жасады.

Спорт саласында ел намысын абыроймен қорғап жүрген Нұрсұлтан Орынбасаров маңызды саяси науқанға қатысып, азаматтық белсенділігін көрсетті.

Ол спорттағы жеңістердің артында тәртіп, табандылық пен жауапкершілік тұрса, ел болашағына қатысты әрбір маңызды қадамда да азаматтық жауапкершіліктің орны ерекше екенін атап өтті.

«Спортта біз әрдайым еліміздің абыройын биік қоюға тырысамыз. Елдің болашағы, бірлігі мен тұрақтылығы – баршамызға ортақ құндылық. Сондықтан әр азамат өз таңдауына жауапкершілікпен қарап, ел дамуына өз үлесін қосуы маңызды», – деді Нұрсұлтан Орынбасаров.

Ащыбұлақ ауылдық округіндегі №1058 сайлау учаскесінде өз таңдауын жасаған спортшы тұрғындарды бірлік пен ынтымаққа, азаматтық белсенділік танытуға үндеді.