Көкпаршылар сайлау учаскесіне ұлттық киіммен келіп, дауыс берді
Іле ауданы Күрті ауылдық округіндегі Ақши ауылының көкпар командасы сайлау күні ерекше белсенділік танытты. Ат үстіндегі додаларда бірге қимылдайтын шабандоздар бұл жолы Құрылтай депутаттарының сайлауына да бір кісідей жиналып келді.
Команданы Ақши ауылы көкпар құрамасының капитаны Райымбек Бөлегенов бастап келді. Аудандық, облыстық және республикалық додаларда топ жарып жүрген жігіттер сайлау учаскесіне ұлттық нақыштағы киіммен келіп, көпшіліктің назарын аударды.
«Көкпар біз үшін тек спорт емес, атадан қалған дәстүрдің жалғасы. Сондықтан жігіттермен ақылдасып, бүгін ұлттық киіммен келуді жөн көрдік. Дәстүр тек додада емес, күнделікті өмірімізде де көрініс табуы керек деп ойлаймыз», – деді Райымбек Бөлегенов.
Ақши ауылының көкпар құрамасы аудандық және облыстық жарыстарда бірнеше мәрте жеңімпаз атанып, республикалық деңгейдегі додаларда да жүлделі орындардан көрініп жүр.
Көкпар алаңында әрқайсысының өз міндеті болғанымен, команданың мақсаты – ортақ. Сайлау күні де жігіттер бір саптан табылып, өз азаматтық ұстанымдарын білдірді. Додада тақымына сенген Іленің көкпаршылары бұл жолы ұлттық болмысымен сайлаушыларға көтеріңкі көңіл-күй сыйлады.
