Marvel әлемінен – Алматы облысына: Байкентте «Өрмекші адам» сайлау учаскесіне келді
Құрылтай депутаттарын сайлау күні Байкент ауылының тұрғындары тапқырлығымен тағы бір мәрте таңғалдырды. №414 сайлау учаскесіне «Өрмекші адам» бейнесіндегі сайлаушы келіп, бірден көпшіліктің назарын өзіне бұрды.
Танымал суперқаһарманды учаскеден көрген көпшіліктің көңіл-күйі көтеріліп, әсіресе балалар мен жастардың қуанышында шек болмады. Дауыс беруге келген тұрғындар арнайы ұйымдастырылған фотоаймақта «Өрмекші адаммен» естелік суретке түсті.
Қызыл-көк түсті танымал костюм дауыс беру күнінің атмосферасына айрықша реңк берді. Тұрғындардың көңілін серпілтіп, ерекше естелік сыйлады.
Айта кетейік, бүгін Алматы облысының тұрғындары Құрылтай депутаттарын сайлауға қатысып жатыр. Өңірде барлығы 683 сайлау учаскесі жұмыс істеп тұр. Миллионнан астам тұрғынның дауыс беруге құқығы бар. Көптеген сайлаушылар бұл тарихи оқиғаның маңызына тоқталып, сайлауға қатысу елдің болашағына үлес қосудың мүмкіндігі екенін айтуда.
Алматы облысының ӨКҚ
