Аманаттықтар Маралсай шатқалынан 2 тонна тұрмыстық қалдық жинады
Алматы облысы Талғар ауданының аумағында орналасқан Іле Алатау мемлекеттік ұлттық паркінің аумағы тазартылды.
Экоакция партия мүшелері, ауыл әкімдігінің қызметкерлері мен белсенді азаматтардың қатысуымен өтті. Шатқалды тазартуға 50-ге жуық адам атсалысты.
«Бүгін экологиялық акциясы аясында Маралсай шатқалында 2 тоннадан астам тұрмыстық қалдық жиналды. Осындай игі істер әрбір азаматтың экологиялық мәдениетін арттырып, туған жерге деген жауапкершілігін тереңдете түседі. Бұл бастаманы тұрақты түрде жалғастырып, Талғар ауданының экологиялық ахуалын жақсартуға үлес қоса береміз», – деді «AMANAT» партиясы Талғар аудандық филиал төрағасы Серік Дүмчібаев.
Экологиялық акцияға еріктілер де белсенді қатысып, 2 гектар жерді қоқыстан тазартып шықты. Шатқал бойында жиналған тұрмыстық қалдықтар арнайы техникалардың көмегімен жиналып, полигонға жеткізілді.
Айта кету керек, «AMANAT» партиясының бастамасымен қолға алынған «Таза бейсенбі» экологиялық акциясы апта сайын өтеді.
