Конституция Преамбуласының жаңаруы: ұлттық құндылықтар мен құқықтық бағдардың жаңғыруы

Қазақстан Конституциясы Преамбуласының жаңартылуы – елдің құқықтық және идеологиялық негіздерін қазіргі заман талаптарына сәйкестендіруге бағытталған салмақты шешім. Преамбула мемлекеттің басты құндылықтарын, қоғам дамуының стратегиялық бағдарын айқындайтын маңызды тұғыр болғандықтан, оның мазмұнын қайта пайымдау – уақыттан туындаған қажеттілік.
Жаңа редакцияда Қазақстанның демократиялық, зайырлы, құқықтық және әлеуметтік мемлекет ретіндегі ұстанымдары айқын көрініс табады. Адам және оның құқықтары мен бостандықтарын ең жоғары құндылық ретінде бекіту құқық үстемдігін күшейтіп, мемлекеттік саясаттың адамға бағытталған сипатын нақтылай түседі. Бұл азамат пен билік арасындағы сенімді нығайтатын маңызды фактор.
Сонымен қатар, билікті бөлу қағидатының, мемлекет пен діннің өзара қатынасының, қоғамдық институттардың рөлінің нақтылануы қоғамдық тұрақтылық пен келісімді сақтауға қызмет етеді. Преамбулада тарихи сабақтастық пен ұлттық құндылықтардың көрініс табуы қоғамды ортақ мақсаттар мен жауапкершілік төңірегінде біріктіруге мүмкіндік береді.
Жалпы алғанда, Конституция Преамбуласына енгізіліп отырған өзгерістер елдің ұзақ мерзімді дамуына бағдар беретін, құқықтық мәдениетті арттыратын және ұлттық бірегейлікті нығайтатын маңызды қадам деп бағаланады.

Алатау қаласының маслихат депутаты
Иманбеков  Айдын Мақпырұлы